अहमदाबाद- राष्ट्रकुल स्पर्धेतील सहभागी भारतीय संघाची सदस्य खेळाडू मयुरी लुटेने 36व्या नॅशनल गेम्स मध्ये दमदार पदार्पण करताना पदकांची हॅट्रिक साजरी केली. तिने सोमवारी टीम स्प्रिंट प्रकारात महाराष्ट्राला किताबाचा बहुमान मिळवून दिला. आंतरराष्ट्रीय सायकलिस्ट मयुरी लुटे शशिकला आगाशे आणि आदिती डोंगरे ने टीम स्प्रिंट प्रकारात सुवर्णपदक पटकावले.
यासह महाराष्ट्राच्या नावे सायकलिंग मध्ये तिसऱ्या पदकाची नोंद झाली. यादरम्यान मयुरी लुटेची कामगिरी लक्षवेधी ठरली.
सोमवारी दुपारच्या सत्रामध्ये सायकलिंगच्या टीम स्प्रिंगचा इव्हेंट आयोजित करण्यात आला होता. या प्रकारामध्ये महाराष्ट्र संघाने सर्वोत्तम कामगिरी साधली. थ्री लॅपच्या या इव्हेंट मध्ये महाराष्ट्र संघाने 503 गुणांची कमाई केली. यासह महाराष्ट्र संघ सुवर्णपदकाचा मानकरी ठरला. यातून महाराष्ट्राच्या मयुरी लुटेला स्पर्धेत तिसरे पदक आपल्या नावे करता आले. आता तिच्या नावे वैयक्तिक दोन पदकासह एका सांघिक पदकाचा समावेश आहे. तिने दोन सुवर्ण आणि कांस्यपदक जिंकले आहे.
महाराष्ट्राची कामगिरी सर्वोत्तम: प्रशिक्षक पाटील
दिल्ली येथील वेलोड्रामावर महाराष्ट्र संघ सर्वोत्तम कामगिरी साधत आहे. त्यामुळे संघाला पदकाची कमाई करता येत आहे. दिल्लीच्या मैदानावर महाराष्ट्र संघाने उल्लेखनीय कामगिरी करताना पदकाची ध्वजा उंच उभारली आहे. त्यामुळे संघाला हे सर्वोत्तम यश संपादन करता आले. यामुळे संघ सर्वोत्तम ठरला, अशा शब्दात प्रशिक्षक दिपाली पाटील यांनी संघावर कौतुकाचा वर्षाव केला.
