इंदूर | विशेष प्रतिनिधी
एककाळी डाकूंसाठी ओळखले जाणारे आणि अनेक हिंदी चित्रपटांचा विषय असलेले चंबळचे खोरे आता यशस्वी क्रिकेटपटूंना जन्म देत आहे. याचे ताजे उदाहरण म्हणजे मध्य प्रदेशचा युवा क्रिकेटपटू सक्षम पुरोहित. २०२६-२७ च्या रणजी ट्रॉफी हंगामातील आपल्या पदार्पणाच्याच सामन्यात सक्षमने दमदार कामगिरी करून सर्वांचे लक्ष वेधले आहे.
इंदूरमधील होळकर स्टेडियमवर सध्या मध्य प्रदेश आणि बिहार यांच्यात सामना खेळवला जात आहे. या सामन्यात ज्या खेळपट्टीवर बिहारचा संपूर्ण संघ अवघ्या ९९ धावांत गारद झाला, त्याच खेळपट्टीवर मध्य प्रदेशच्या डावखुऱ्या आणि विकेटकीपर फलंदाज सक्षम पुरोहितने शानदार शतक झळकावले. आपल्या पहिल्याच रणजी सामन्यात पहिल्या दिवसाचा खेळ संपेपर्यंत सक्षमने १६६ चेंडूंचा सामना करत नाबाद ११३ धावांची खेळी केली.
चंबळचा रहिवासी असलेला आणि तिथे लोकप्रिय असलेला सक्षम एका सामान्य कुटुंबातून येतो. त्याचे वडील जितेंद्र पुरोहित हे पेशाने शिक्षक आहेत. वयाच्या १२ व्या वर्षापासूनच सक्षमने क्रिकेट अकादमीत प्रशिक्षणासाठी जाण्यास सुरुवात केली. त्याने चौधरी दिलीप सिंह लॉ कॉलेजच्या मैदानावर प्रशिक्षक रवी शेखर कटारे यांच्या मार्गदर्शनाखाली क्रिकेटचे धडे गिरवले आहेत.
सक्षमने यापूर्वी विविध वयोगटांमध्ये स्वतःला सिद्ध केले आहे. तो मध्य प्रदेशच्या १४ वर्षांखालील, १६ वर्षांखालील, १९ वर्षांखालील आणि २३ वर्षांखालील संघांकडून खेळला आहे. कर्नल सी के नायडू ट्रॉफीत त्याने मध्य प्रदेश संघाचे कर्णधारपदही भूषवले होते. याव्यतिरिक्त, मध्य प्रदेश टी-२० लीगमध्ये तो मालवा स्टॅलियन्स संघाकडून मैदानात उतरला होता.
नुकतेच २३ वर्षांखालील गटात पंजाबविरुद्ध मध्य प्रदेश संघाचे नेतृत्व करताना त्याने १६५ धावांची मोठी खेळी केली होती. त्यापाठोपाठ चंदीगडविरुद्धही त्याने १३० धावा कुटल्या होत्या. याच सातत्यपूर्ण आणि उत्कृष्ट कामगिरीच्या जोरावर सक्षमला मध्य प्रदेशच्या रणजी संघात स्थान मिळाले आणि त्याने पहिल्याच संधीचे सोने केले.
दरम्यान, रणजी ट्रॉफीच्या इतर सामन्यांमध्येही फलंदाजांची जोरदार कामगिरी पाहायला मिळाली. चंदीगडच्या मैदानावर हिमाचल प्रदेशविरुद्ध सुरु असलेल्या सामन्यात चंदीगडच्या फलंदाजांनी चमक दाखवली. नेहल पजनीने नाबाद १२६, अर्जुन आझादने १४७ तर मनन वोहराने ६१ धावा केल्या. झारखंडविरुद्ध खेळताना दिल्लीचा कर्णधार आयुष बदोनी यानेही शतकी खेळी केली. तर मुंबई संघाकडून खेळताना मुशीर खान आणि अंगकृष रघुवंशी यांनी शतके झळकावली. रघुवंशीचे हे रणजी क्रिकेटमधील पहिलेच शतक ठरले आहे.
📌 महत्वाच्या बातम्या
- आयपीएल २०२७ चा मिनी लिलाव आणि भारत विरुद्ध श्रीलंका वनडे सामना एकाच दिवशी येणार
- ईएमएमटीसी राष्ट्रीय टेनिस स्पर्धेत महाराष्ट्राच्या स्पर्श पाटील, लव परदेशी, अद्विक खन्ना, वीर चतुर, वेद परदेशी आणि शौर्य गडदे यांची आगेकूच
- पाकिस्तानची हिरवी जर्सी गायब, संघ गुलाबी रंगात मैदानात! इंग्लंडविरुद्धच्या सामन्यात असा का झाला बदल?
