प्रतिनिधी | पुणे
महाराष्ट्र शासनाच्या शिवछत्रपती राज्य क्रीडा पुरस्कारांसाठी सन २०२४–२५ आणि सन २०२५–२६ या दोन्ही वर्षांचे अर्ज मागविण्यात आले आहेत. पात्र खेळाडू, क्रीडा मार्गदर्शक, दिव्यांग खेळाडू आणि साहसी उपक्रमांत सहभागी झालेल्या खेळाडू अथवा व्यक्तींना १२ ऑक्टोबर ते १५ नोव्हेंबर २०२६ या कालावधीत ऑनलाइन अर्ज करता येणार आहेत. याबाबत क्रीडा व युवक सेवा संचालनालयाने ९ ऑक्टोबर रोजी पत्र जारी केले आहे.
राज्याच्या क्रीडा क्षेत्रात विशेष उल्लेखनीय कार्य करणाऱ्यांना शासनाच्या वतीने विविध पुरस्कारांनी गौरविण्यात येते. यामध्ये ज्येष्ठ क्रीडा महर्षींसाठी जीवन गौरव पुरस्कार, उत्कृष्ट क्रीडा मार्गदर्शक पुरस्कार, महिला क्रीडा मार्गदर्शकांसाठी जिजामाता राज्य क्रीडा पुरस्कार, तसेच खेळाडू, साहसी उपक्रम आणि दिव्यांग खेळाडू या प्रकारांतील शिवछत्रपती राज्य क्रीडा पुरस्कारांचा समावेश आहे.
सुधारित नियमावलीनुसार अर्ज प्रक्रिया
संचालनालयाच्या पत्रानुसार, २९ डिसेंबर २०२३ आणि २५ जानेवारी २०२४ च्या शासन निर्णयांनुसार शिवछत्रपती राज्य क्रीडा पुरस्कारांची सुधारित नियमावली विहित करण्यात आली आहे. या नियमावलीनुसार सन २०२४–२५ आणि सन २०२५–२६ या दोन्ही वर्षांच्या पुरस्कारांसाठी अर्ज मागविण्यात येत आहेत.
इच्छुक क्रीडा मार्गदर्शक, खेळाडू, साहसी उपक्रमांतील सहभागी आणि दिव्यांग खेळाडूंनी क्रीडा विभागाच्या https://sports.maharashtra.gov.in या संकेतस्थळावर विहित मुदतीत अर्ज सादर करावेत, असे आवाहन करण्यात आले आहे.
१५ नोव्हेंबरच्या रात्रीपर्यंत अर्जाची संधी
अर्ज केवळ ऑनलाइन प्रणालीद्वारे स्वीकारले जाणार आहेत. १५ नोव्हेंबर २०२६ रोजी रात्री ११ वाजून ५९ मिनिटे ५९ सेकंदापर्यंत अर्ज सादर करता येतील, असे पत्रात स्पष्ट करण्यात आले आहे.
