औरंगाबाद (प्रतिनिधी): गरवारे क्रिकेट संकुलावर सुरू असलेल्या कास्मो फिल्म प्रायोजित व शहीद भगतसिंह क्रीडा व सांस्कृतिक मंडळ आयोजित ३० व्या शहीद भगतसिंह टी-२० क्रिकेट सामन्यांमध्ये उपांत्यपूर्व फेरीच्या पहिल्या सामन्यात ग्रामीण पोलीस संघाने एमजीएम ‘अ’ संघावर ५२ धावांनी आणि दुसऱ्या सामन्यात मसिआ ‘ब’ संघाने महावितरण ‘अ’ संघावर ९ गडी राखून विजय मिळवत उपांत्य फेरीत प्रवेश केला. आजचा सामन्यात विकास नगरकर व मधुर पटेल सामनावीर ठरले.
पहिल्या लढतीत ग्रामीण पोलीस संघाने नाणेफेक जिंकून प्रथम फलंदाजी करताना निर्धारित २० षटकात ५ बाद १८२ धावा केल्या. यामध्ये अजय काळेने सर्वाधिक ३६ चेंडूत ५ उत्तुंग षटकार व ४ चौकारांसह ७२ धावा काढल्या. साहिल तडवीने ४९ चेंडूत ५ चौकारांसह नाबाद ४९ धावा तर विकास नगरकरने २३ चेंडूत १ षटकार व २ चौकारांसह २९ धावांचे योगदान दिले. एमजीएम ‘अ’ संघातर्फे गोलंदाजी करताना कर्णधार सागर शेवाळे, सय्यद जलीस, शेखर ताठे, रहीम खान यांनी प्रत्येकी १ गडी बाद केला. प्रत्युत्तरात एमजीएम ‘अ’ संघ निर्धारित २० षटकांत १३० धावाच करू शकला. यामध्ये अमित पाठकने २५ चेंडूत २ उत्तुंग षटकार व ४ चौकारांसह ४० धावा, सुमित लोंढेने ३२ चेंडूत ३ चौकारांसह २५ धावा, अमर असोलकरने १३ चेंडूत १ षटकार व २ चौकारांसह १७ धावा तर शेखर ताठे व अनिरुद्ध शास्त्री यांनी प्रत्येकी १५ धावांचे योगदान दिले. ग्रामीण पोलीस संघातर्फे गोलंदाजी करताना विकास नगरकरने केवळ १३ धावात ३ महत्त्वपूर्ण गडी बाद केले. इम्रान लफ्ती व किरण लहाने यांनी प्रत्येकी २ गडी व श्रीकांत तळेगावेने ८ धावात १ गडी बाद केला.
मधुरचे अर्धशतक, रामचे चौघांना तंबूत पाठवले :
दुसऱ्या लढतीत महावितरण ‘अ’ संघाने नाणेफेक जिंकून प्रथम फलंदाजी करताना निर्धारित २० षटकात सर्वबाद ११७ धावा केल्या. यामध्ये सय्यद इनायत अलीने ३५ चेंडूत १ षटकार व २ चौकारांसह ३१ धावा, अब्दुल आतीक खानने २४ चेंडूत ५ चौकारांसह ३० धावा शाहेद सिद्दीकीने १८ चेंडूत १ चौकारासह १८ धावांचे योगदान दिले. मसीआ ‘ब’ संघातर्फे गोलंदाजी करताना राम राठोडने केवळ २२ धावात ४ महत्त्वपूर्ण गडी बाद केले. गिरीष खात्रीने २१ धावात २ गडी, तर संदीप गायकवाड, पंकज फलके व मंगेश नितुरकर यांनी प्रत्येकी १ गडी बाद केला. प्रत्युत्तरात मसीआ ‘ब’ संघाने विजयी लक्ष १२ षटकात १ गड्याच्या मोबदल्यात पूर्ण केले. यामध्ये मधुर पटेलने अप्रतिम खेळी करताना केवळ ३७ चेंडूत २ उत्तुंग षटकार व ११ चौकारांसह नाबाद ७० धावांची खेळी केली. त्याला साथ देत निकित चौधरीने २६ चेंडूत ६ चौकारांसह नाबाद ३३ धावा तर संदीप गायकवाडने १० चेंडूत २ चौकारांसह १४ धावांचे योगदान दिले. महावितरण ‘अ’ संघातर्फे गोलंदाजी करताना कैलास शेळके यांनी एक मात्र गडी बाद केला.