छत्रपती संभाजीनगर | प्रतिनिधी
राज्यस्तरीय शालेय १७ वर्षांखालील मुले व मुलींच्या वुशू क्रीडा स्पर्धेचे विभागीय क्रीडा संकुल, गारखेडा येथे उद्घाटन झाले. क्रीडा व युवक सेवा संचालनालय, महाराष्ट्र राज्य, पुणे; उपसंचालक, क्रीडा व युवक सेवा; जिल्हा क्रीडा परिषद आणि जिल्हा क्रीडा अधिकारी कार्यालय यांच्या संयुक्त विद्यमाने या स्पर्धेचे आयोजन करण्यात आले आहे.
उद्घाटनप्रसंगी जीएसटी उपायुक्त चंद्रशेखर बोर्डे, नवनाथ औताडे, जिल्हा क्रीडा अधिकारी मुकुंद वाडकर, तसेच तांत्रिक निवड समितीचे सदस्य दिनेश माळी, लक्ष्मण उदमले, अविनाश पाटील, महेश इंदापुरे, विजय खंडार, पांडुरंग अंभोरे आणि प्रमोद उपस्थित होते. कार्यक्रमाचे सूत्रसंचालन क्रीडा अधिकारी गणेश पाळवदे यांनी केले.
राज्य व राष्ट्रीय स्तरावरील क्रीडा स्पर्धांचे आयोजन करण्यासाठी क्रीडा सुविधांच्या विकासाला अधिक महत्त्व दिले पाहिजे, असे चंद्रशेखर बोर्डे यांनी मनोगतात सांगितले.
स्पर्धेसाठी महाराष्ट्रातील आठ विभागांमधून सुमारे २०० खेळाडू आले असून, त्यांच्यासोबत संघव्यवस्थापक आणि क्रीडा मार्गदर्शकही उपस्थित आहेत. बुधवारी १७ वर्षांखालील मुलींच्या स्पर्धेचा समारोप होणार आहे.
स्पर्धेच्या यशस्वी आयोजनासाठी क्रीडा अधिकारी सुजाता गुल्हाने, डॉ. रेखा परदेशी, खंडू यादवराव, रामकिशन मायंदे, गणेश पाळवदे, राज्य क्रीडा मार्गदर्शक पुनम नवगिरे, शिल्पा मोरे, तुषार आहेर, अनिल दांडगे, सीमा खोब्रागडे, सचिन बोर्डे आदी परिश्रम घेत आहेत.
