छत्रपती संभाजीनगर | प्रतिनिधी
विभागीय क्रीडा संकुलात उभारण्यात आलेल्या अत्याधुनिक सिंथेटिक ॲथलेटिक्स ट्रॅकवर सराव करणाऱ्या मुला-मुलींमधून भविष्यात भारतासाठी पदके जिंकणारे खेळाडू घडतील, असा विश्वास मुख्यमंत्री देवेंद्र फडणवीस यांनी व्यक्त केला.
गारखेडा येथील विभागीय क्रीडा संकुलातील ४०० मीटर सिंथेटिक ॲथलेटिक्स ट्रॅक, नैसर्गिक हिरवळीचे फुटबॉल मैदान, स्टेडियम मास्ट अर्थात फ्लड लाईट्स आणि युवा वसतिगृहाचे लोकार्पण रविवारी मुख्यमंत्र्यांच्या हस्ते झाले. यावेळी ते बोलत होते.
छत्रपती संभाजीनगरमध्ये सुंदर सिंथेटिक ट्रॅक आणि फ्लड लाईट्सची सुविधा उपलब्ध झाली आहे. या मैदानावर सराव करणारा एखादा मुलगा किंवा मुलगी भविष्यात भारतासाठी पदक मिळवेल, असा विश्वास मुख्यमंत्र्यांनी व्यक्त केला. या सुविधांच्या उभारणीसाठी योगदान देणाऱ्या विभागीय क्रीडा संकुल समिती आणि क्रीडा विभागाचे अभिनंदन करून त्यांनी खेळाडूंना शुभेच्छा दिल्या.
१२ कोटी ७५ लाखांत सिंथेटिक ट्रॅक आणि फुटबॉल मैदान
क्रीडा संकुलात १२ कोटी ७५ लाख रुपये खर्चून आठ लेनचा ४०० मीटर सिंथेटिक ॲथलेटिक्स ट्रॅक आणि नैसर्गिक हिरवळीचे फुटबॉल मैदान विकसित करण्यात आले आहे. १०० मीटर धावण्याच्या स्पर्धेसाठी दहा लेन उपलब्ध आहेत.
या सुविधांमुळे धावणे, अडथळा शर्यती, रिले, लांब उडी, उंच उडी, गोळाफेक आणि भालाफेक यांसारख्या विविध क्रीडाप्रकारांचा सराव व स्पर्धा घेता येणार आहेत. फुटबॉल मैदानावर आधुनिक स्प्रिंकलर सिंचन यंत्रणाही बसविण्यात आली आहे.
८८ फ्लड लाईट्समुळे सायंकाळीही सरावाची सुविधा
दहा हजार प्रेक्षक क्षमतेच्या स्टेडियममध्ये चार उंच मास्टवर प्रत्येकी २२, असे एकूण ८८ दिवे बसविण्यात आले आहेत. या प्रकल्पासाठी ११ कोटी ६७ लाख ४२ हजार रुपयांच्या खर्चास प्रशासकीय मान्यता देण्यात आली आहे. फ्लड लाईट्समुळे सायंकाळच्या वेळेतही खेळाडूंना सराव करता येणार असून, स्पर्धांचे आयोजन करणेही शक्य होणार आहे.
खेळाडूंच्या निवासासाठी चार कोटी रुपयांच्या निधीतून युवा वसतिगृह उभारण्यात आले आहे. वसतिगृहात १६ खोल्यांसह परिषद सभागृह, स्वयंपाकगृह, भोजनगृह, ग्रंथालय आणि वाचन कक्षाच्या सुविधा उपलब्ध आहेत.
मुख्यमंत्र्यांच्या हस्ते प्रदर्शनी शर्यतींना प्रारंभ
लोकार्पणानंतर नव्या सिंथेटिक ट्रॅकवर मुली आणि मुलांच्या १०० मीटर प्रदर्शनी धावण्याच्या स्पर्धा घेण्यात आल्या. मुख्यमंत्री फडणवीस यांनी क्लॅप देऊन दोन्ही स्पर्धांना प्रारंभ केला. राष्ट्रीय आणि राज्यस्तरीय स्पर्धांमध्ये सहभागी झालेल्या शहरातील खेळाडूंनी या शर्यतींमध्ये सहभाग घेतला. मुख्यमंत्र्यांनी क्रीडा प्रबोधिनीतील खेळाडूंशी संवाद साधून त्यांच्यासमवेत छायाचित्रही काढले.
यावेळी विभागीय आयुक्त जी. श्रीकांत आणि क्रीडा उपसंचालक शेखर पाटील यांच्या हस्ते मुख्यमंत्र्यांना सिंथेटिक ट्रॅकची प्रतिकृती, अजिंठा-वेरूळ शिल्प असलेले सन्मानचिन्ह आणि त्यांच्या नावाच्या इंग्रजी आद्याक्षरांवर आधारित ‘डीएफ’ क्रीडा साहित्य संच भेट देण्यात आला.
कार्यक्रमाला सामाजिक न्याय मंत्री तथा पालकमंत्री संजय शिरसाट, इतर मागास बहुजन कल्याण मंत्री अतुल सावे, खासदार संदिपान भुमरे, आमदार सुहास शिरसाट, अनुराधा चव्हाण, नारायण कुचे, विभागीय आयुक्त जी. श्रीकांत, जिल्हाधिकारी विनय गौडा जी. सी., महानगरपालिका आयुक्त अमोल येडगे, क्रीडा उपसंचालक शेखर पाटील यांच्यासह लोकप्रतिनिधी, अधिकारी, क्रीडाप्रशिक्षक आणि खेळाडू उपस्थित होते.
या नव्या सुविधांमुळे मराठवाड्यातील खेळाडूंना दर्जेदार सराव, प्रशिक्षण आणि निवासाची व्यवस्था एकाच ठिकाणी उपलब्ध झाली आहे. राज्य व राष्ट्रीय स्तरावरील स्पर्धांच्या आयोजनालाही यामुळे चालना मिळणार आहे.
