औरंगाबाद – महाराष्ट्र ज्युदो संघटनेची नुकत्याच झालेल्या निवडणुकीत राज्यातील जिल्हा संघटना मतदारांनी पुन्हा एकदा कौल देत राज्य संघटनेच्या अध्यक्षपदी साताऱ्याचे ॲड.धनंजय भोसले यांना विजयी केले तर रत्नागिरीचे शैलेश टिळक यांची राज्य संघटनेच्या महासचिवपदी बिनविरोध निवड झाली आहे. राज्य तांत्रिक समिती सचिव पदी दत्ता आफळे औरंगाबाद यांची निवड झाली आहे.
महाराष्ट्र ज्युदो संघटनेची सातारा येथे रविवारी निवडणूक प्रक्रिया पार पडली. निवडणूक अधिकारी म्हणून निवृत्त जिल्हा न्यायाधीश दिलीप गायकवाड, निवडणुकीत निरीक्षक म्हणून भारतीय ज्युदो महासंघाचे कोषाध्यक्ष कैलास यादव, व महाराष्ट्र ऑलिम्पिक संघटनेच्या वतीने संघटनेचे सहसचिव दयानंद कुमार यांनी काम पहिले.
नवनिर्वाचित राज्य कार्यकारिणी
उपाध्यक्ष पदी मुंबईचे बिलोमोरिया कावस व वाय. एन. बंगेरा, नागपूरचे पुरुषोत्तम चौधरी व अमरावतीचे राजकुमार पूनकर यांची, सहसचिव पदी बीडचे गणेश शेटकर, कोषाध्यक्ष पदी नाशिकचे रवींद्र मेतकर, तर सदस्य पदी सतीश पहाडे अमरावती, अतुल बामनोदकर औरंगाबाद, विकास पाटील सातारा, विश्वास जोशी औरंगाबाद, चंद्रशेखर साखरे सांगली, प्रविण गडदे उस्मानाबाद, निलेश गोयथळे रत्नागिरी, जयंत साखरे यवतमाळ, प्रविण कोपतिकर नांदेड, निखिल सुवर्णा ठाणे, वीरधवल पाटोळे कोल्हापूर यांची तर विशेष वरिष्ठ सदस्य पदी रत्नाकर पटवर्धन नाशिक, अर्चना केवाळे अमरावती, शोभना शेटकर बीड यांची वर्णी लागली आहे.
गुणवंत व दर्जेदार ज्युदो पटू घडविण्यासाठी आवश्यकता आहे ती अत्याधुनिक साहित्यासह तांत्रिक प्रशिक्षणाची, भविष्यात राज्यातील प्रत्येक जिल्ह्यात अत्याधुनिक प्रशिक्षण व साहित्य उपलब्ध होण्यासह संपूर्ण ३६ जिल्ह्यात ज्युदो या खेळाचा प्रचार व प्रसार होण्यावर भर असणार आहे.
