स्पोर्ट्स पॅनोरमा | वृत्तसेवा
राष्ट्रकुल क्रीडा स्पर्धा २०२६ मध्ये भारतीय ज्युदोपटूंचा पदकधडाका कायम आहे. भारताच्या यामिनी मौर्याने महिला 57 किलो वजनी गटात शानदार कामगिरी करत रौप्यपदक पटकावले. अंतिम फेरीपर्यंत दमदार मजल मारलेल्या यामिनीला सुवर्णपदकाच्या लढतीत इंग्लंडच्या अनुभवी असेल्या टोप्राक (Acelya Toprak) हिच्याकडून पराभव स्वीकारावा लागला.
अंतिम फेरीपर्यंत यामिनीची दमदार झेप
स्पर्धेत सुरुवातीपासून प्रभावी कामगिरी करत यामिनीने एकामागून एक आव्हाने पार केली आणि पदक निश्चित करत अंतिम फेरी गाठली. सुवर्णपदकाच्या निर्णायक लढतीत तिच्यासमोर इंग्लंडच्या अनुभवी टोप्राकचे कठीण आव्हान होते.
टोप्राकने बर्मिंगहॅम राष्ट्रकुल क्रीडा स्पर्धा २०२२ मध्ये रौप्यपदक मिळवले होते. अशा अनुभवी प्रतिस्पर्धीविरुद्ध यामिनीने जिद्द आणि आत्मविश्वासाने लढत दिली. मात्र अखेर टोप्राकने बाजी मारल्याने यामिनीचे सुवर्णपदकाचे स्वप्न अपूर्ण राहिले.
सुवर्ण हुकले, पण रौप्याची चमक
अंतिम सामन्यात पराभव झाला असला तरी यामिनीची संपूर्ण स्पर्धेतील कामगिरी लक्षवेधी ठरली. महिला 57 किलो गटात अंतिम फेरीपर्यंत पोहोचून तिने रौप्यपदकावर नाव कोरले आणि भारताच्या पदकतालिकेत आणखी एका प्रतिष्ठेच्या पदकाची भर घातली.
राष्ट्रकुलच्या मोठ्या व्यासपीठावर दाखवलेली तिची जिद्द आणि लढाऊ वृत्ती भारतीय ज्युदोसाठी महत्त्वाची कामगिरी ठरली.
भारतीय ज्युडोची राष्ट्रकुलमध्ये चमक
अस्मिता डे आणि हर्ष सिंग यांच्या सुवर्ण यशानंतर यामिनी मौर्याच्या रौप्यपदकाने भारतीय ज्युदोच्या यशस्वी मोहिमेला आणखी बळ मिळाले आहे.
दोन सुवर्णांनंतर यामिनीच्या रौप्यपदकामुळे राष्ट्रकुल क्रीडा स्पर्धा २०२६ मध्ये भारतीय ज्युडोची चमक अधिकच वाढली आहे.
