छत्रपती संभाजीनगर | प्रतिनिधी
छत्रपती संभाजीनगर येथील ईएमएमटीसी टेनिस कॉम्प्लेक्समध्ये सुरू असलेल्या १४ वर्षांखालील राष्ट्रीय टेनिस अजिंक्यपद स्पर्धेत अनपेक्षित निकालांची मालिका पाहायला मिळाली. एआयटीए आणि एमएसएलटीए यांच्या मान्यतेने ईएमएमटीसीतर्फे आयोजित या स्पर्धेत आदित्य कामत, मानव पटेल, रिशिता यादव, चौधरी सिंग आणि अथर्व पेरम यांनी मानांकित प्रतिस्पर्ध्यांना पराभवाचा धक्का देत स्पर्धेचा दिवस गाजवला.
मुलांच्या गटातील मुख्य ड्रॉच्या उप-उपांत्यपूर्व फेरीत कर्नाटकमधून आलेल्या तेराव्या मानांकित आदित्य कामतने खळबळजनक निकाल नोंदवला. त्याने महाराष्ट्राच्या अव्वल मानांकित स्पर्श पाटीलचा ७-५, ६-२ असा सरळ सेटमध्ये पराभव केला. दुसरीकडे, गुजरातच्या मानव पटेलने तामिळनाडूच्या अकराव्या मानांकित हरिहरन महामुनीला ६-१, ६-१ असे एकतर्फी नमवले. तर, महाराष्ट्राचा तिसरा मानांकित खेळाडू प्रणव गायकवाडने दिल्लीच्या पंधराव्या मानांकित विराज जरवालवर १-६, ६-४, ७-५ अशा तीन सेटपर्यंत रंगलेल्या रोमहर्षक लढतीत मात करून उपांत्यपूर्व फेरीतील आपले स्थान निश्चित केले.
मुलींच्या गटातही धक्कादायक निकाल समोर आले. महाराष्ट्राची नववी मानांकित खेळाडू रिशिता यादव हिने तिसऱ्या मानांकित तृषा भोसलेचा ६-२, ६-३ असा पराभव करत स्पर्धेत अनपेक्षित निकाल नोंदवला. तसेच, उत्तराखंडच्या बिगर मानांकित चौधरी सिंगने सहाव्या मानांकित उत्तर प्रदेशच्या अदित्री सिंगचे आव्हान ६-१, ६-१ असे सहज संपुष्टात आणले. आंध्र प्रदेशच्या दहाव्या मानांकित अथर्व पेरमने तामिळनाडूच्या पाचव्या मानांकित आराधना तेहलनवर ६-१, १-६, ६-४ अशा अटीतटीच्या सामन्यात विजय मिळवून आगेकूच केली.
मुलांच्या इतर उप-उपांत्यपूर्व फेरीतील लढतींमध्ये तेलंगणाच्या चौथ्या मानांकित सुजाई पोथुलाने महाराष्ट्राच्या १४ व्या मानांकित आवीर घुमरेचा ६-२, ६-१ असा पराभव केला. तामिळनाडूच्या सहाव्या मानांकित देवांश कंबोजने राजस्थानच्या १२ व्या मानांकित रोनक हरियानीला ६-७(३), ६-१, ६-२ असे नमवले. तसेच तामिळनाडूच्याच सातव्या मानांकित जेगन सेंथिलने महाराष्ट्राच्या १० व्या मानांकित अर्चन पाठकवर ७-५, ६-२ अशी मात केली. गुजरातच्या ८ व्या मानांकित प्रयाग पटेलने महाराष्ट्राच्या आरव शहाला (१६) ६-३, ६-३ असे हरवले, तर तेलंगणाच्या दुसऱ्या मानांकित सत्या चिंतागुंताने तामिळनाडूच्या शिशांत शिवराजवर ५-७, ६-२, ६-४ असा संघर्षपूर्ण विजय मिळवला.
मुलींच्या इतर उप-उपांत्यपूर्व सामन्यांत उत्तर प्रदेशच्या अव्वल मानांकित सिद्धी पांडेने महाराष्ट्राच्या १६ व्या मानांकित जनीषा बियाणीला ६-०, ६-२ असे एकतर्फी पराभूत केले. गुजरातच्या चौथ्या मानांकित फलक मेहताने कर्नाटकच्या प्रणवुता पलासंद्रमवर ६-२, ६-४ असा विजय मिळवला. महाराष्ट्राच्या दुसऱ्या मानांकित मायरा शेखने कर्नाटकच्या १२ व्या मानांकित सान्वी मोहनला ६-४, ६-० असे, तर कर्नाटकच्या शर्वी गहलोतने महाराष्ट्राच्या रायमा चव्हाणला ६-१, ६-४ असे नमवले. महाराष्ट्राच्या ७ व्या मानांकित शौर्या पाटीलने राज्याच्याच वृषा छटवानीचा ६-३, ६-४ असा पराभव केला.
मुलांच्या दुहेरीतील सामन्यांमध्येही रंगतदार खेळ पाहायला मिळाला. आरव बेले (महाराष्ट्र) आणि अभिनव शर्मा (हिमाचल प्रदेश) यांच्या जोडीने लव परदेशी व अरिंजय बांग (दोघेही महाराष्ट्र) यांचा ६-१, ६-२ असा पराभव केला. राजस्थानचा रोनक हरियानी आणि कर्नाटकचा आदित्य कामत या चौथ्या मानांकित जोडीने केरळच्या डी अरुणकुमार व तामिळनाडूच्या एबिनेश सुरेशवर ६-३, ४-६, १०-८ अशी मात केली. शिशांत शिवराज व हरिहरन महामुनी (दोघेही तामिळनाडू) यांनी झायन मोहम्मद (तेलंगणा) व हर्ष पाटील पुदी (आंध्र प्रदेश) यांना ६-१, ६-२ असे हरवले. कबीर गुंडेचा (महाराष्ट्र) व अहील मोहम्मद (तेलंगणा) यांनी टी धर्मराज (तामिळनाडू) व एस मुदलियार (कर्नाटक) यांचा ६-०, ७-५ असा पराभव करून यश मिळवले.
