स्पोर्ट्स पॅनोरमा | विशेष प्रतिनिधी
भारतीय क्रिकेट नियामक मंडळ (BCCI) भविष्यात महिला प्रीमियर लीगचा (WPL) विस्तार करण्याची शक्यता आहे. बीसीसीआयचे सचिव देवजित सैकिया यांनी अलीकडेच २०२७ च्या हंगामासाठी झालेल्या खेळाडूंच्या लिलावादरम्यान महिला फ्रँचायझी लीगला पुढे नेण्याच्या आणि संघांची संख्या वाढवण्याच्या योजनांचे स्पष्ट संकेत दिले आहेत.
बीसीसीआयचे सचिव देवजित सैकिया आणि बोर्डाच्या मते, महिला प्रीमियर लीगने भारतीय महिला क्रिकेटवर आणि पर्यायाने जागतिक महिला क्रिकेटवर अत्यंत मोठा प्रभाव पाडला आहे. अल्पावधीतच मिळवलेल्या या यशामुळे बीसीसीआय लीगच्या विस्ताराचा गांभीर्याने विचार करत आहे. भविष्यात या टी-२० लीगमध्ये अधिक संघ सहभागी होताना दिसू शकतात.
२०२३ मधील पहिल्या हंगामापासून रॉयल चॅलेंजर्स बेंगळुरू (RCB), मुंबई इंडियन्स (MI), दिल्ली कॅपिटल्स (DC), गुजरात जायंट्स (GG) आणि युपी वॉरियर्स (UPW) या पाच फ्रँचायझींचा लीगमध्ये समावेश आहे. अवघ्या चार हंगामांमध्ये या लीगने राष्ट्रीय आणि आंतरराष्ट्रीय बाजारात लक्षवेधी यश मिळवले आहे. अटीतटीचे सामने, चुरशीच्या लढती आणि नवोदित क्रिकेटपटूंसाठी हे एक उत्तम व्यासपीठ असल्यामुळे या स्पर्धेला मोठे महत्त्व प्राप्त झाले आहे. या लीगच्या माध्यमातून तरुण महिला क्रिकेटपटूंना आंतरराष्ट्रीय स्तरावरील दिग्गज खेळाडूंसोबत खेळण्याची संधी मिळते, जे या स्पर्धेचे प्रमुख आकर्षण मानले जाते.
बुधवारी लीगच्या अधिकृत वेबसाईटशी बोलताना सैकिया यांनी माहिती दिली की, सर्व शक्यता पडताळून पाहिल्यानंतर बीसीसीआय या संदर्भात पुढील पावले उचलेल. संघांची संख्या वाढवणे हा त्यातीलच एक महत्त्वाचा टप्पा असू शकतो. सर्व योजनांनुसार सुरळीत पार पडल्यास, पुढील वर्षापासून महिला लीगमध्ये नव्या गोष्टींवर विचारमंथन केले जाऊ शकते.
सैकिया म्हणाले, “पुढील वर्षापासून नक्कीच आम्हाला संघांची संख्या वाढवण्यासाठी तसेच इतर क्षेत्रांमध्ये सुधारणा करण्यासाठी काही विचारमंथन (brainstorming sessions) करावे लागेल.”
इंडियन प्रीमियर लीग (IPL) नंतर महिला प्रीमियर लीगने स्थापनेपासूनच मोठी वाढ दर्शवली असल्याचे सैकिया यांनी आपल्या निवेदनात नमूद केले. केवळ चार हंगामांनंतर ही लीग भारतातील महिला क्रिकेटपटूंसाठी यशस्वी योगदान देत असून महिला क्रिकेटवर अधिराज्य गाजवत आहे.
“आयपीएलनंतर फ्रँचायझी क्रिकेटमधील मोठ्या लीगपैकी डब्ल्यूपीएल एक आहे. आम्ही चार वर्षांत मोठा पल्ला गाठला असून, शेवटी आम्ही आता महिला क्रिकेटवर वर्चस्व गाजवत आहोत. या लीगने भारतातील महिला क्रिकेटच्या यशात मोठे योगदान दिले आहे,” असे ते पुढे म्हणाले.
डब्ल्यूपीएलच्या अधिकृत सोशल मीडिया प्लॅटफॉर्मवर देखील सैकिया यांच्या प्रतिक्रियेचा संदर्भ देण्यात आला आहे. डब्ल्यूपीएलच्या यशामुळे संपूर्ण महिला क्रिकेट इकोसिस्टमवर सकारात्मक परिणाम झाला असून जास्तीत जास्त क्रिकेटपटूंपर्यंत याचे फायदे पोहोचवणे आणि विस्तारावर लक्ष केंद्रित करणे हा यामागचा उद्देश असल्याचे त्यांनी स्पष्ट केले.
दरम्यान, २०२७ च्या हंगामासाठी सर्व पाच संघांनी त्यांचे संपूर्ण स्क्वॉड निश्चित केले असून ते पुढील हंगामासाठी सज्ज आहेत. बुधवार, २८ ऑक्टोबर रोजी पार पडलेल्या मिनी लिलावादरम्यान फ्रँचायझींनी आपापले संघ पूर्ण केले. या लिलावात ऑस्ट्रेलियाची कर्णधार सोफी मोलिनक्स सर्वात महागडी खेळाडू ठरली. युपी वॉरियर्सने तिच्यावर १.१० कोटी रुपयांची सर्वोच्च बोली लावली.
हा मिनी लिलाव असल्याने सर्व फ्रँचायझींनी अत्यंत सावध आणि रणनीतिक पावले उचलली. एकाच खेळाडूवर मोठी रक्कम खर्च करण्याऐवजी जास्तीत जास्त नवोदित गुणवत्ता (raw talent) संघात घेण्यावर संघांनी विशेष भर दिला.
