स्पोर्ट्स पॅनोरमा | प्रतिनिधी
आंतरराष्ट्रीय क्रिकेट परिषदेने (ICC) २०२७ मध्ये होणाऱ्या १९ वर्षांखालील (U19) महिला टी-२० विश्वचषक स्पर्धेचे अधिकृत वेळापत्रक जाहीर केले आहे. क्रिकेट चाहत्यांसाठी ही एक मोठी बातमी असून, या स्पर्धेचा हा तिसरा हंगाम बांगलादेश आणि नेपाळ या देशांमध्ये संयुक्तपणे आयोजित केला जाणार आहे. येत्या २१ जानेवारी ते ६ फेब्रुवारी दरम्यान चित्तगोंग, सिल्हेट आणि काठमांडू येथील चार मैदानांवर एकूण १६ संघांमध्ये ४१ सामने रंगणार आहेत.
या स्पर्धेत सहभागी १६ संघांची प्रत्येकी चार संघांच्या चार वेगवेगळ्या गटांमध्ये विभागणी करण्यात आली आहे. भारतीय संघाचा समावेश ‘अ’ गटात करण्यात आला असून, या गटात वेस्ट इंडिज, आयर्लंड आणि नेपाळ हे संघ आहेत. ‘ब’ गटात पाकिस्तान, दक्षिण आफ्रिका, न्यूझीलंड आणि सामोआ या देशांचा समावेश आहे. ‘क’ गटात ऑस्ट्रेलिया, बांगलादेश, संयुक्त अरब अमिराती व नायजेरिया हे संघ भिडतील. तर ‘ड’ गटात इंग्लंड, श्रीलंका, अमेरिका आणि स्कॉटलंड एकमेकांसमोर उभे ठाकतील.
चित्तगोंग, सिल्हेट आणि काठमांडू या ठिकाणच्या चारही मैदानांवरील परिस्थिती अगदी भारतातील मैदानांसारखीच आहे. त्यामुळे भारतीय संघाला या स्पर्धेचे यजमानपद भूषवल्यासारखाच फायदा मिळण्याची शक्यता आहे. दोन वेळचा गतविजेता असलेला भारतीय संघ आपल्या विजेतेपदाच्या बचावाची सुरुवात २२ जानेवारी रोजी काठमांडू येथील टीयू आंतरराष्ट्रीय क्रिकेट स्टेडियमवर वेस्ट इंडिजविरुद्धच्या लढतीने करणार आहे.
स्पर्धेच्या उद्घाटन दिवशी, म्हणजे २१ जानेवारीला एकूण चार सामने खेळवले जातील, ज्यामध्ये आठ संघ मैदानात उतरतील. सकाळच्या सत्रात बांगलादेशचा सामना युएईशी होईल, तर मागील हंगामातील उपविजेता ऑस्ट्रेलिया दुपारी नायजेरियाविरुद्ध खेळेल. काठमांडू येथील अप्पर मुलपानी आंतरराष्ट्रीय क्रिकेट मैदानावर श्रीलंका आणि स्कॉटलंड आमनेसामने असतील. याशिवाय इंग्लंडचा सामना अमेरिकेशी होईल.
२२ जानेवारी रोजी भारताच्या सामन्याव्यतिरिक्त यजमान नेपाळचा सामना आयर्लंडशी, चित्तगोंगमध्ये न्यूझीलंडचा सामना सामोआशी आणि दक्षिण आफ्रिकेचा सामना पाकिस्तानशी होईल. गट फेरी २६ जानेवारीपर्यंत चालेल. त्यानंतर पात्र ठरणारे संघ सुपर सिक्स फेरीत प्रवेश करतील, जिथे सहा संघांचे दोन गट पाडले जातील. या प्रत्येक गटातील अव्वल दोन संघ उपांत्य फेरीसाठी पात्र ठरतील.
स्पर्धेचे उपांत्य फेरीचे सामने ४ फेब्रुवारी रोजी बीर श्रेष्ठ शहीद फ्लाइट लेफ्टनंट मतिउर रहमान क्रिकेट स्टेडियमवर खेळवले जातील (यासाठी ५ फेब्रुवारी हा दिवस राखीव असेल). अंतिम सामना ६ फेब्रुवारीला स्थानिक वेळेनुसार दुपारी १:३० वाजता आणि भारतीय प्रमाणवेळेनुसार (IST) दुपारी १:०० वाजता सुरू होईल. अंतिम सामन्यासाठी ७ फेब्रुवारी हा राखीव दिवस ठेवण्यात आला आहे.
आयसीसीचे सीईओ संजोग गुप्ता यांनी एका निवेदनात म्हटले आहे की, ही स्पर्धा महिला क्रिकेटच्या विकासात अत्यंत महत्त्वाची भूमिका बजावते. तरुण खेळाडूंना त्यांच्या वयोगटात सर्वोच्च स्तरावर खेळण्याची आणि जागतिक पातळीवर अनुभव मिळवण्याची ही एक उत्तम संधी आहे. बांगलादेश आणि नेपाळमध्ये होणाऱ्या या स्पर्धेमुळे महिला क्रिकेटमधील वाढत्या प्रतिभेची खोली दिसून येईल. तसेच, प्रस्थापित आणि उदयोन्मुख क्रिकेट खेळणाऱ्या देशांतील खेळाडूंना आंतरराष्ट्रीय पातळीवर प्रगती करण्याची संधी मिळेल.
