लोळगे चषकात चार शाळांची विजयी सुरुवात

छत्रपती संभाजीनगर | प्रतिनिधी : लोळगे चषक आंतरशालेय क्रिकेट स्पर्धेत १९ सप्टेंबर रोजी स्टेपिंग स्टोन्स स्कूल, वूड्रिज हायस्कूल, एसएफएस हायस्कूल आणि आर. जे. इंटरनॅशनल स्कूलने आपापले सामने जिंकले. हादी मोतीवाला, समरवीर पाटील, मुझम्मिल शेख आणि साईराज यांनी सामनावीर पुरस्कार पटकावले.

स्टेपिंग स्टोन्सचा ११५ धावांनी विजय

 देवगिरी येथील सामन्यात स्टेपिंग स्टोन्स स्कूलने २० षटकांत ९ बाद २३८ धावांचा डोंगर उभारला. हादी मोतीवालाने ३६ चेंडूंत ६५, तर देव पटेलने २१ चेंडूंत ४१ धावा केल्या. प्रत्युत्तरात होली क्रॉसचा डाव १२३ धावांवर संपला. आर्यन वायबासेने ५१ चेंडूंत ८२ धावांची झुंज दिली; मात्र त्याला संघाला विजय मिळवून देता आला नाही. हादीने गोलंदाजीतही दोन बळी घेतले आणि तो सामनावीर ठरला.

वूड्रिजचा दहा गडी राखून विजय

देवगिरी कॉलेज मैदानावरील दुसऱ्या सामन्यात वूड्रिज हायस्कूलच्या गोलंदाजांनी सीएसआर इंटरनॅशनलला १४.३ षटकांत ३५ धावांवर रोखले. समरवीर पाटीलने १२ धावांत तीन बळी घेतले. त्यानंतर त्याने १० चेंडूंत नाबाद ३४ धावा फटकावत वूड्रिजला अवघ्या १.५ षटकांत बिनबाद ३८ धावांपर्यंत पोहोचवले. समरवीरला सामनावीर घोषित करण्यात आले.

एसएफएस हायस्कूलचा चार गडी राखून विजय

 एडीसीए मैदानावरील सकाळच्या सामन्यात गायकवाड ग्लोबलने १८.५ षटकांत १०१ धावा केल्या. अक्षर तर्डेने ५२ चेंडूंत ३९ धावा केल्या. एसएफएसकडून अश्वितेज पवार व शुभम गायाळ यांनी प्रत्येकी तीन, तर मुझम्मिल शेखने दोन बळी घेतले. एसएफएसने १६.४ षटकांत ६ बाद १०४ धावा करून लक्ष्य गाठले. २५ चेंडूंत २७ धावा आणि दोन बळी अशी अष्टपैलू कामगिरी करणारा मुझम्मिल सामनावीर ठरला.

आर. जे. इंटरनॅशनलचा सहा गडी राखून विजय

 दुपारच्या सामन्यात देवगिरी ग्लोबलचा डाव ११ षटकांत ४८ धावांवर आटोपला. आर. जे. इंटरनॅशनलच्या साईराजने नऊ धावांत चार, तर मानव कपाडेने १३ धावांत चार बळी घेतले. आर. जे. इंटरनॅशनलने ६.३ षटकांत ४ बाद ५१ धावा करून विजय मिळवला. तथागत पांडेने १७ चेंडूंत २० धावा केल्या. साईराज सामनावीर ठरला.