स्पोर्ट्स पॅनोरमा | विशेष प्रतिनिधी
भारतीय पुरुष क्रिकेट संघाच्या मुख्य निवडकर्ता पदावरून अजित आगरकर पायउतार झाल्यानंतर आता या जागी माजी फिरकीपटू प्रज्ञान ओझा यांची नियुक्ती करण्यात आली आहे. बीसीसीआयने १९ ऑक्टोबर २०२६ रोजी हा महत्त्वपूर्ण निर्णय घेत ओझा यांच्याकडे हंगामी मुख्य निवडकर्त्याची जबाबदारी सोपवली आहे. या नव्या जबाबदारीसाठी ओझा यांना वर्षाकाठी तब्बल ३ कोटी रुपये मानधन म्हणून दिले जाणार आहेत.
गेल्या काही दिवसांपासून अजित आगरकर यांच्या जागी नव्या निवडकर्त्याच्या शोधाबाबत सातत्याने चर्चा सुरू होत्या. अखेर या चर्चांना पूर्णविराम मिळाला असून बीसीसीआयने प्रज्ञान ओझा यांची या पदावर निवड केली आहे. विशेष म्हणजे, मुख्य निवडकर्त्याच्या पगारामध्ये कोणताही बदल करण्यात आलेला नाही. त्यामुळे माजी निवडकर्ता आगरकर यांच्याप्रमाणेच ओझा यांनाही वार्षिक ३ कोटी रुपये पगार मिळणार आहे.
या महत्त्वपूर्ण बदलासोबतच माजी भारतीय फिरकी गोलंदाज रमेश पवार यांचीही निवड समितीत नियुक्ती करण्यात आली आहे. आता या नव्या ५ सदस्यीय समितीमध्ये प्रज्ञान ओझा यांच्यासह शिवसुंदर दास, आर. पी. सिंह, अजय रात्रा आणि रमेश पवार या सदस्यांचा समावेश असणार आहे.
