हैदराबाद
भारतीय संघाचे मुख्य प्रशिक्षक गौतम गंभीर यांचा १४ ऑक्टोबर रोजी ४५ वा वाढदिवस होता. या विशेष दिवशी भारतीय संघ त्यांना विजयाचे आणि मालिका खिशात घालण्याचे गिफ्ट देईल अशी आशा होती. मात्र, वेस्ट इंडिजचा कर्णधार शाई होपने भारताच्या या आशांवर पाणी फेरले. चौथ्या टी-२० सामन्यात वेस्ट इंडिजने भारतावर २४ धावांनी विजय मिळवत गंभीर यांच्या बर्थडे पार्टीचा बेरंग केला आणि मालिकेत २-२ अशी बरोबरी साधली.
हैदराबाद येथील राजीव गांधी आंतरराष्ट्रीय स्टेडियमवर हा सामना खेळवला गेला. प्रथम फलंदाजीला उतरलेल्या वेस्ट इंडिज संघाने विहित २० षटकांत ३ गडी गमावून तब्बल २४७ धावांचा डोंगर उभारला. कर्णधार शाई होपने संघासाठी सर्वाधिक १०२ धावांची दमदार शतकी खेळी केली. भारताकडून गोलंदाजी करताना अक्षर पटेल, अर्शदीप सिंग आणि प्रिन्स यादव यांना यश मिळाले.
वेस्ट इंडिजने दिलेल्या २४८ धावांच्या भल्यामोठ्या लक्ष्याचा पाठलाग करताना भारतीय संघाचा डाव १९.४ षटकांत २२३ धावांवर संपुष्टात आला. भारताच्या डावातील पाचव्या षटकात कीमो पॉलने दोन मोठे धक्के दिले. त्याने केवळ ६ धावा करणाऱ्या इशान किशनला आणि आक्रमक फलंदाजी करणाऱ्या संजू सॅमसनला बाद केले. संजू सॅमसनने अवघ्या २३ चेंडूंमध्ये संघासाठी सर्वाधिक ५६ धावांची खेळी केली.
त्यानंतर अभिषेक शर्मा २४ चेंडूत २९ धावा करून माघारी परतला, तर नमन धीरला भोपळाही फोडता आला नाही. तो शून्यावर बाद झाला. मध्यफळीत तिलक वर्मा आणि नितीश कुमार रेड्डी यांनी संघर्ष करत ३२ चेंडूत ७० धावांची महत्त्वपूर्ण भागीदारी रचली. तिलकने २५ चेंडूत ४३, तर नितीश कुमारने २० चेंडूत ४१ धावा केल्या.
अक्षर पटेल केवळ ३ धावा करू शकला आणि प्रिन्स नाबाद परतला. दरम्यान, अर्शदीप सिंगला हाताला दुखापत झाल्यामुळे ‘रिटायर्ड आऊट’ होऊन मैदान सोडावे लागले. वेस्ट इंडिजकडून उत्कृष्ट गोलंदाजी करताना कीमो पॉलने सर्वाधिक ५ गड्यांची शिकार केली.
