छत्रपती संभाजीनगर | प्रतिनिधी :
गुजरातमधील अहमदाबाद येथे ६ ते १३ सप्टेंबरदरम्यान झालेल्या पश्चिम विभागीय नेमबाजी स्पर्धेत ईगल स्टार शूटिंग अकॅडमीच्या सात खेळाडूंनी राष्ट्रीय नेमबाजी स्पर्धेसाठी पात्रता मिळवली. या स्पर्धेत वरद भंडारेने रौप्यपदकही पटकावले, अशी माहिती अकॅडमीने पत्राद्वारे दिली.
वरद भंडारे, सार्थक जाधव, स्वराज कंकाळे, आयुष तावडे, कैवल्य अग्रवाल, नंदनी सिरसाट आणि उर्वेळा मोरे या खेळाडूंची महाराष्ट्राच्या संघात निवड झाली आहे. वरदने १० मीटर एअर पिस्तूल कनिष्ठ पुरुष गटात ४०० पैकी ३६७ गुण मिळवत रौप्यपदक जिंकले. त्याने २५ मीटर स्पोर्ट्स पिस्तूल प्रकारातही कामगिरी केली. इतर खेळाडूंनी १० मीटर एअर पिस्तूलच्या पुरुष व महिला गटांत सहभाग नोंदवला; स्वराज कंकाळेने २५ मीटर स्पोर्ट्स पिस्तूल प्रकारातही भाग घेतला.
या स्पर्धेत महाराष्ट्रासह गुजरात, मध्य प्रदेश, गोवा आणि दीव-दमण येथील नेमबाज सहभागी झाले होते. अकॅडमीच्या माहितीनुसार, राष्ट्रीय स्पर्धेसाठी पात्र ठरलेल्या सातही खेळाडूंनी अवघ्या वर्षभरापूर्वी नेमबाजीचा सराव सुरू केला होता. त्यांना आंतरराष्ट्रीय नेमबाजी प्रशिक्षक सुंदर घाटे यांचे मार्गदर्शन लाभले.
या यशाबद्दल अकॅडमी तसेच जिल्ह्यातील रायफल संघटनेच्या पदाधिकाऱ्यांनी खेळाडूंचे अभिनंदन केले.
