स्पोर्ट्स पॅनोरमा | विशेष प्रतिनिधी
वेस्ट इंडिजविरुद्धच्या टी-२० मालिकेतील पाचव्या आणि अंतिम सामन्यापूर्वी भारतीय संघाचा कर्णधार श्रेयस अय्यरने वैभव सूर्यवंशीला प्लेइंग इलेव्हनमध्ये संधी का मिळत नाही, याबाबत स्पष्टीकरण दिले आहे. सलग पाचही सामन्यांमध्ये वैभवला बेंचवर बसावे लागल्याने श्रेयसने त्याच्याशी नेमका काय संवाद साधला, हे उलगडले आहे. वैभवला सध्या संधीसाठी प्रतीक्षा करावी लागेल, असे श्रेयसने स्पष्ट केले.
भारतीय संघातील सध्याची सलामीची जोडी सातत्याने उत्तम कामगिरी करत आहे. भारताला टी-२० विश्वचषक जिंकून देण्यातही या जोडीने अत्यंत महत्त्वाची भूमिका बजावली होती. त्यामुळे आता संजू सॅमसन किंवा अभिषेक शर्मा यापैकी एकाला बाहेर बसवून वैभवला संधी देणे कठीण असल्याचे श्रेयसच्या बोलण्यातून समोर आले आहे.
आयपीएल २०२६ मध्ये ऑरेंज कॅप जिंकून वैभव सूर्यवंशीने सर्वांचे लक्ष वेधले होते. त्यानंतर त्याला भारतीय संघात स्थान देण्यात आले. मात्र, आतापर्यंत त्याला केवळ आठच सामने खेळण्याची संधी मिळाली आहे. झिम्बाब्वेविरुद्धच्या मालिकेत तो सामनावीर ठरला होता, परंतु अफगाणिस्तान आणि वेस्ट इंडिजविरुद्धच्या मालिकांमध्ये त्याला प्लेइंग इलेव्हनमध्ये जागा मिळू शकलेली नाही.
वैभवला संधी का मिळत नाही, यावर बोलताना श्रेयस अय्यरने सांगितले, “मी त्याला फक्त एवढंच सांगतो की, तुला नक्कीच संधी मिळेल. पाहा, असे 2 फलंदाज आहेत, ज्यांनी भारताला विश्वचषक जिंकून दिला आहे आणि ते सातत्याने धावा करत आहेत. त्यामुळे, तू तुझ्या प्रक्रियेवर विश्वास ठेव आणि योग्य दृष्टिकोन कायम राख. सध्या संधी मिळण्याबाबत जास्त विचार करू नकोस.”
तो पुढे म्हणाला, “आयपीएलचा शानदार हंगाम खेळल्यानंतर वैभवच्या मनात काय सुरू असेल, याची मला कल्पना आहे. पण, काही वेळा तुम्हाला प्रतीक्षा करावी लागते. आमच्याकडे दोन उत्कृष्ट सलामीवीर आहेत, जे सातत्याने चांगली कामगिरी करत आहेत. अफगाणिस्तान मालिकेपासून वैभवसोबत माझा असाच संवाद सुरू आहे.”
दुसरीकडे, प्रशिक्षक गौतम गंभीर यांनीही वैभव सूर्यवंशीला भारतीय संघात संधी मिळवण्यासाठी वाट पाहावी लागेल अशी भूमिका स्पष्ट केली आहे. सध्या तो संघासोबत असून त्याला वरिष्ठ खेळाडूंकडून शिकण्याची मोठी संधी मिळत आहे. दरम्यान, भारताचे माजी कर्णधार कपिल देव यांनी वैभवच्या पुढील दोन ते तीन वर्षांचा काळ त्याच्या कारकिर्दीसाठी अत्यंत महत्त्वाचा असल्याचे विधान केले होते. या काळात वैभवने आपली नम्रता कायम ठेवून मेहनत सुरूच ठेवली, तर त्याला मोठा खेळाडू होण्यापासून कोणीही रोखू शकणार नाही, असा विश्वास कपिल देव यांनी व्यक्त केला होता.
