स्पोर्ट्स पॅनोरमा | विशेष प्रतिनिधी
आशियाई क्रिकेट परिषदेने (ACC) ‘पुरुष आशिया कप रायझिंग स्टार्स २०२६’ चे अधिकृत वेळापत्रक जाहीर केले आहे. या आगामी स्पर्धेत क्रिकेट चाहत्यांचे सर्वाधिक लक्ष भारत आणि पाकिस्तान या दोन कट्टर प्रतिस्पर्ध्यांमध्ये होणाऱ्या बहुचर्चित महामुकाबल्यावर असणार आहे. हा सामना चाहत्यांसाठी एक मोठी पर्वणी ठरणार आहे.
या स्पर्धेची दुसरी आवृत्ती १९ ते २९ नोव्हेंबर या कालावधीत कतारमध्ये आयोजित करण्यात आली आहे. स्पर्धेतील सर्व सामने दोहा येथील ‘वेस्ट एंड पार्क आंतरराष्ट्रीय क्रिकेट स्टेडियम’ आणि ‘दोहा विज्ञान व तंत्रज्ञान विद्यापीठ’ यांच्या क्रिकेट मैदानावर पार पडतील. गेल्या वर्षी ही स्पर्धा टी-२० स्वरूपात खेळवली गेली होती, मात्र यंदा त्यात बदल करण्यात आला असून ही स्पर्धा ५० षटकांच्या स्वरूपात होणार आहे. पाकिस्तान ‘अ’ संघाने २०२५ च्या अंतिम फेरीत बांगलादेश ‘अ’ चा पराभव करून विजेतेपद पटकावले होते, त्यामुळे ते आता गतविजेते म्हणून या स्पर्धेत सहभागी होतील.
यंदाच्या स्पर्धेत एकूण आठ संघांचा सहभाग असून त्यांची प्रत्येकी चार संघांच्या दोन गटांत विभागणी करण्यात आली आहे. ‘गट अ’ मध्ये श्रीलंका अ, बांगलादेश अ, अफगाणिस्तान अ आणि हाँगकाँग या संघांचा समावेश आहे. तसेच ‘गट ब’ मध्ये भारत अ, पाकिस्तान अ, नेपाळ आणि युएई हे संघ आमनेसामने असतील. गट टप्प्यात प्रत्येक संघ आपल्या गटातील उर्वरित तीन संघांसोबत खेळेल, ज्यामुळे एकूण १२ सामने होतील. प्रत्येक गटातील अव्वल दोन संघ उपांत्य फेरीसाठी पात्र ठरतील.
क्रिकेट चाहत्यांना २२ नोव्हेंबर रोजी होणाऱ्या भारत ‘अ’ आणि पाकिस्तान ‘अ’ यांच्यातील हाय-व्होल्टेज सामन्याची उत्सुकता आहे. ‘गट ब’ मधील हा महत्त्वाचा सामना दोहा येथे भारतीय प्रमाणवेळेनुसार दुपारी ३:३० वाजता सुरू होईल. मागील हंगामात पाकिस्तानकडून झालेल्या पराभवाचा बदला घेण्याच्या उद्देशाने भारतीय संघ मैदानात उतरेल. जर या दोन्ही संघांनी आपापल्या उपांत्य फेऱ्या पार केल्या, तर २९ नोव्हेंबर रोजी होणाऱ्या अंतिम सामन्यात पुन्हा एकदा भारत आणि पाकिस्तान यांच्यात लढत होऊ शकते. हा अंतिम सामना रविवारी असल्यामुळे चाहत्यांसाठी तो दिवस खास ठरणार आहे.
स्पर्धेदरम्यान दररोज दोन सामने खेळवले जातील, ज्यामध्ये पहिला सामना भारतीय प्रमाणवेळेनुसार सकाळी ११:३० वाजता आणि दुसरा सामना दुपारी ३:३० वाजता सुरू होईल. १९ नोव्हेंबर रोजी बांगलादेश ‘अ’ विरुद्ध हाँगकाँग (सकाळी ११:३०) आणि श्रीलंका ‘अ’ विरुद्ध अफगाणिस्तान ‘अ’ (दुपारी ३:३०) हे सामने होतील. २० नोव्हेंबरला पाकिस्तान ‘अ’ विरुद्ध युएई (सकाळी ११:३०) आणि भारत ‘अ’ विरुद्ध नेपाळ (३:३० वाजता) लढत होईल. २१ नोव्हेंबर रोजी श्रीलंका ‘अ’ विरुद्ध हाँगकाँग (सकाळी ११:३०) आणि बांगलादेश ‘अ’ विरुद्ध अफगाणिस्तान ‘अ’ (दुपारी ३:३०) हे संघ भिडतील.
२२ नोव्हेंबरला युएई आणि नेपाळ यांच्यात सकाळी ११:३० वाजता सामना होईल, तर बहुप्रतीक्षित भारत ‘अ’ विरुद्ध पाकिस्तान ‘अ’ हा सामना ३:३० वाजता खेळवला जाईल. २३ नोव्हेंबरला अफगाणिस्तान ‘अ’ विरुद्ध हाँगकाँग (सकाळी ११:३०) आणि श्रीलंका ‘अ’ विरुद्ध बांगलादेश ‘अ’ (दुपारी ३:३०) हे सामने रंगतील. २४ नोव्हेंबर रोजी भारत ‘अ’ विरुद्ध युएई (सकाळी ११:३०) आणि पाकिस्तान ‘अ’ विरुद्ध नेपाळ (दुपारी ३:३०) यांच्यात लढत होईल.
गट टप्प्यातील या सामन्यांनंतर, २६ नोव्हेंबर रोजी ‘अ१’ आणि ‘ब२’ यांच्यात पहिली उपांत्य फेरी दुपारी ३:३० वाजता पार पडेल. त्यानंतर २७ नोव्हेंबरला ‘ब१’ आणि ‘अ२’ यांच्यात दुसरी उपांत्य फेरी दुपारी ३:३० वाजता होईल. तर स्पर्धेचा अंतिम सामना २९ नोव्हेंबर रोजी दुपारी ३:३० वाजता रंगणार आहे.
