प्रतिनिधी | छत्रपती संभाजीनगर
राष्ट्रीय क्रीडा दिनाचे औचित्य साधून छत्रपती संभाजीनगर महानगरपालिकेच्या वतीने मनपा शाळांमधून विविध क्रीडा प्रकारांत राज्यस्तरावर उल्लेखनीय कामगिरी करणाऱ्या गुणवंत खेळाडूंचा मनपा मुख्यालयात गौरव करण्यात आला. याच कार्यक्रमात विद्यार्थ्यांना शालेय क्रीडा स्पर्धांची सर्वसमावेशक माहिती उपलब्ध करून देणाऱ्या ‘शालेय क्रीडा स्पर्धा माहिती पुस्तिकेचे’ अनावरण करण्यात आले.
मनपा शाळांतील विद्यार्थ्यांमध्ये खेळाची आवड निर्माण करणे, त्यांच्यातील क्रीडा गुणांना योग्य व्यासपीठ उपलब्ध करून देणे आणि त्यांना राज्य, राष्ट्रीय तसेच आंतरराष्ट्रीय स्तरावरील स्पर्धांसाठी तयार करणे, या उद्देशाने महानगरपालिकेच्या क्रीडा विभागाकडून विविध उपक्रम राबविण्यात येत आहेत. राष्ट्रीय क्रीडा दिनानिमित्त आयोजित हा सोहळा त्याच प्रयत्नांचा एक भाग ठरला.
महापौर समीर राजूरकर यांच्या प्रमुख उपस्थितीत हा कार्यक्रम पार पडला. यावेळी विरोधी पक्षनेते अब्दुल समीर बिल्डर, मनपा आयुक्त अमोल येडगे, नगरसेवक राज गौरव वानखेडे, शिवाजी दांडगे, किशोर नागरे, काकासाहेब काकडे, सुनील जगताप, मतीन पटेल, अतिरिक्त आयुक्त रणजित पाटील, उपायुक्त अंकुश पांढरे आणि क्रीडा विभाग प्रमुख विजय पाटील यांच्यासह अधिकारी, प्रशिक्षक, क्रीडा मार्गदर्शक, विद्यार्थी व पालक उपस्थित होते.
राज्यस्तरीय गुणवंत खेळाडूंचा सन्मान
मनपा शाळांमध्ये शिक्षण घेत विविध क्रीडा प्रकारांमध्ये राज्यस्तरावर उत्कृष्ट कामगिरी करणाऱ्या खेळाडूंना मान्यवरांच्या हस्ते स्मृतिचिन्ह व गौरवपत्र देऊन सन्मानित करण्यात आले.
सत्कार झालेल्या खेळाडूंमध्ये पृथ्वीराज नलावडे – तलवारबाजी, पूर्वा जोगदंडे – रायफल शूटिंग, सायली हिवाळे – रायफल शूटिंग, खुशी एकलहरे – रायफल शूटिंग, फरान शेख – रायफल शूटिंग, प्रणव गुंजाळ – कुस्ती, श्लोक गायकवाड – कॅरम, शिवराज चव्हाण – तलवारबाजी, श्रावणी तुपे – बास्केटबॉल, मैथिली उंटवाल – जलतरण, जीशान शेख – बॉल बॅडमिंटन आणि जर्जिस शेख – बॉल बॅडमिंटन यांचा समावेश होता.
तसेच कराटे क्रीडा प्रकारातील सारा एस. के. युनूस, इफा इफ्तेखार खान, उम्मे कुलसुम सय्यद नजीब, हुमा जावेद, आफिया, सुमेस्सा, जिक्रा जुबेर आणि मोहम्मद हुसेन यांचाही गौरव करण्यात आला.
या खेळाडूंनी विविध स्पर्धांमध्ये दमदार कामगिरी करत मनपा शाळांसह छत्रपती संभाजीनगर महानगरपालिकेचे नाव उज्ज्वल केले आहे. उपस्थित मान्यवरांनी सर्व खेळाडूंचे अभिनंदन करत त्यांच्या पुढील क्रीडा वाटचालीस शुभेच्छा दिल्या.
खेळाडूंना घडविणाऱ्या प्रशिक्षकांचाही गौरव
खेळाडूंच्या यशामागे सातत्याने मेहनत घेणाऱ्या प्रशिक्षक आणि क्रीडा मार्गदर्शकांच्या योगदानाचीही या कार्यक्रमात दखल घेण्यात आली. क्रीडा क्षेत्रासाठी योगदान देणाऱ्या समीर शेख, अरबाज खान, सचिन लवरिया, सचिन परदेशी, इरफान सय्यद, हरिदास मस्के आणि अखिब जावेद यांचा मान्यवरांच्या हस्ते सत्कार करण्यात आला.
खेळाडूंची गुणवत्ता ओळखणे, त्यांना नियमित सरावासाठी प्रोत्साहित करणे आणि विविध स्पर्धांसाठी तयार करण्यामध्ये प्रशिक्षकांची भूमिका महत्त्वाची असल्याचे यावेळी अधोरेखित करण्यात आले.
पुस्तिकेचे अनावरण झाले; पण शालेय क्रीडा स्पर्धांच्या नियोजनाची महत्त्वाची बैठक अद्याप नाही
राष्ट्रीय क्रीडा दिनानिमित्त महानगरपालिकेच्या ‘शालेय क्रीडा स्पर्धा माहिती पुस्तिके’चे अनावरण करण्यात आले असले, तरी याच पार्श्वभूमीवर मनपा शाळांमधील आगामी शालेय क्रीडा स्पर्धांचे प्रत्यक्ष नियोजन करण्यासाठी आवश्यक असलेली महत्त्वाची बैठक अद्याप झालेली नसल्याची बाब समोर येत आहे.
शालेय क्रीडा स्पर्धांचे वर्षभराचे नियोजन करताना विविध खेळांच्या स्पर्धांचे वेळापत्रक, मैदाने व क्रीडा स्थळांची उपलब्धता, पंच व तांत्रिक अधिकाऱ्यांची नियुक्ती, विद्यार्थ्यांच्या प्रवेशिका, शाळानिहाय सहभाग, वाहतूक, क्रीडा साहित्य, वैद्यकीय सुविधा तसेच स्पर्धांच्या आयोजनाची जबाबदारी याबाबत संबंधित अधिकारी, मुख्याध्यापक, क्रीडा शिक्षक आणि क्रीडा मार्गदर्शक यांच्यात समन्वय असणे अत्यंत आवश्यक आहे.
मात्र, माहिती पुस्तिकेचे अनावरण झाले असताना प्रत्यक्ष स्पर्धांच्या अंमलबजावणीसाठी आवश्यक असलेली नियोजन बैठक अद्याप का घेण्यात आलेली नाही?, असा प्रश्न आता उपस्थित होत आहे.
पुस्तिकेबरोबर प्रत्यक्ष नियोजनालाही गती देण्याची गरज
केवळ माहिती पुस्तिका प्रकाशित करून उद्दिष्ट पूर्ण होणार नसून, त्यातील स्पर्धा आणि उपक्रम प्रत्यक्षात वेळेत व नियोजनबद्ध पद्धतीने राबविणे तितकेच महत्त्वाचे आहे. स्पर्धांचे वेळापत्रक विद्यार्थ्यांना आणि शाळांना पुरेशा कालावधीपूर्वी मिळाल्यास खेळाडूंना सरावाचे नियोजन करता येईल. प्रशिक्षकांनाही संघनिवड व तयारीसाठी आवश्यक वेळ मिळेल.
त्यामुळे मनपा प्रशासनाने संबंधित अधिकारी, मुख्याध्यापक, शारीरिक शिक्षण शिक्षक, क्रीडा शिक्षक व क्रीडा मार्गदर्शकांची संयुक्त शालेय क्रीडा नियोजन बैठक तातडीने आयोजित करून स्पर्धांचे स्पष्ट वेळापत्रक आणि जबाबदाऱ्यांचे वाटप जाहीर करावे, अशी अपेक्षा क्रीडा क्षेत्रातून व्यक्त होत आहे.
एकीकडे राष्ट्रीय क्रीडा दिनी राज्यस्तरीय गुणवंत खेळाडूंचा गौरव आणि शालेय क्रीडा स्पर्धा माहिती पुस्तिकेचे अनावरण ही सकारात्मक बाब असली, तरी दुसरीकडे आगामी स्पर्धांच्या प्रत्यक्ष नियोजनाची बैठकच अद्याप झालेली नसेल, तर ‘पुस्तिकेतील नियोजन प्रत्यक्ष मैदानावर कधी उतरणार?’ हा प्रश्न कायम राहतो.
मनपा शाळांमधून राष्ट्रीय व आंतरराष्ट्रीय दर्जाचे खेळाडू घडविण्याचे ध्येय प्रत्यक्षात आणायचे असेल, तर सत्कार आणि पुस्तिका प्रकाशनाबरोबरच वेळेवर नियोजन, नियमित प्रशिक्षण, दर्जेदार सुविधा आणि स्पर्धांचे काटेकोर आयोजन यांनाही तितकेच प्राधान्य देणे आवश्यक ठरणार आहे.
अभ्यासासोबत खेळालाही तितकेच महत्त्व द्या
यावेळी महापौर समीर राजूरकर आणि मनपा आयुक्त अमोल येडगे यांनी गुणवंत खेळाडूंचे अभिनंदन करत त्यांच्या पुढील वाटचालीस शुभेच्छा दिल्या.
विद्यार्थ्यांनी अभ्यासाबरोबरच खेळालाही महत्त्व देणे आवश्यक असल्याचे त्यांनी सांगितले. खेळामुळे विद्यार्थ्यांची शारीरिक तंदुरुस्ती सुधारण्याबरोबरच त्यांच्यामध्ये शिस्त, आत्मविश्वास, नेतृत्वगुण, निर्णयक्षमता आणि संघभावना विकसित होते. त्यामुळे विद्यार्थ्यांनी नियमितपणे मैदानी तसेच विविध क्रीडा उपक्रमांमध्ये सहभागी व्हावे, असे आवाहन करण्यात आले.
राष्ट्रीय क्रीडा दिनानिमित्त गुणवंत खेळाडू व प्रशिक्षकांचा गौरव तसेच शालेय क्रीडा स्पर्धा माहिती पुस्तिकेच्या अनावरणाचा कार्यक्रम यशस्वी करण्यासाठी कार्यक्रमाधिकारी ज्ञानदेव सांगळे आणि क्रीडा मार्गदर्शक सागर मगरे यांनी विशेष मेहनत घेतली.
राष्ट्रीय क्रीडा दिनी झालेला हा गौरव मनपा शाळांतील विद्यार्थ्यांसाठी प्रेरणादायी ठरला असून, भविष्यात महानगरपालिका शाळांमधून अधिकाधिक राज्य, राष्ट्रीय आणि आंतरराष्ट्रीय दर्जाचे खेळाडू घडविण्याच्या दिशेने हा उपक्रम महत्त्वपूर्ण ठरणार आहे.
